టాటా సన్స్ చైర్మన్గా ఎన్. చంద్రశేఖరన్ పునర్నియామకంపై టాటా ట్రస్ట్స్, టాటా సన్స్ మధ్య విభేదాలు మరింత ముదిరాయి.
చంద్రశేఖరన్ను మరో ఐదేళ్ల కాలానికి చైర్మన్గా కొనసాగించేందుకు సెప్టెంబర్ 17న టాటా సన్స్ బోర్డు తీర్మానం చేసింది. ఈ తీర్మానానికి నలుగురు డైరెక్టర్లు అనుకూలంగా ఓటు వేయగా.. టాటా ట్రస్ట్స్ చైర్మన్, బోర్డులోని నామినీ డైరెక్టర్ నోయెల్ టాటా వ్యతిరేకంగా ఓటు వేశారు.
అయితే ఈ తీర్మానం టాటా సన్స్ ఆర్టికల్స్ ఆఫ్ అసోసియేషన్కు అనుగుణంగా లేదని టాటా ట్రస్ట్స్ పేర్కొంది. చైర్మన్ నియామకం లేదా పునర్నియామకానికి టాటా ట్రస్ట్స్ నామినేట్ చేసిన డైరెక్టర్లలో మెజారిటీ మద్దతు అవసరమని ట్రస్ట్స్ వాదిస్తోంది. బోర్డులో ఇద్దరు ట్రస్ట్స్ నామినీ డైరెక్టర్లు ఉండగా, వారిలో ఒకరు తీర్మానానికి వ్యతిరేకంగా ఓటు వేయడంతో అవసరమైన మద్దతు లభించలేదని తెలిపింది.
అలాగే, మొత్తం బోర్డు ఓట్లలో సమాన పరిస్థితి ఏర్పడినప్పుడు మాత్రమే చైర్మన్కు ఉన్న కాస్టింగ్ ఓటు వర్తిస్తుందని, ట్రస్ట్స్ నామినీ డైరెక్టర్లకు సంబంధించిన ప్రత్యేక నిబంధనను అది అధిగమించలేదని టాటా ట్రస్ట్స్ స్పష్టం చేసింది. ఈ కారణంగా సెప్టెంబర్ 17న తీసుకున్న చంద్రశేఖరన్ పునర్నియామక తీర్మానం చెల్లుబాటు కాదన్నది ట్రస్ట్స్ వైఖరి.
మరోవైపు, టాటా సన్స్ బోర్డు చంద్రశేఖరన్ను మరో ఐదేళ్లకు కొనసాగించే నిర్ణయం తీసుకుంది. ఈ పరిణామంతో టాటా సన్స్, టాటా ట్రస్ట్స్ మధ్య కార్పొరేట్ గవర్నెన్స్, బోర్డు అధికారాలు, భవిష్యత్ నాయకత్వం వంటి అంశాలపై వివాదం మరింత ముందుకు వెళ్లే పరిస్థితి ఏర్పడింది. ఈ అంశంపై న్యాయపరమైన పరిణామాలు కూడా ఉండే అవకాశం ఉందని తాజా నివేదికలు పేర్కొంటున్నాయి
