న్యూజెర్సీలో వైభవంగా సాయి దత్త పీఠం దసరా నవరాత్రి ఉత్సవాలు 2026

న్యూజెర్సీ: అమెరికాలోని న్యూజెర్సీలో ఉన్న సాయి దత్త పీఠం శ్రీ శివ విష్ణు దేవాలయంలో దసరా నవరాత్రి ఉత్సవాలు 2026 అత్యంత వైభవంగా జరిగాయి. ఈ సందర్భంగా 108వ బాబా పుణ్యతిథి వేడుకలు, శ్రీ వేంకటేశ్వర స్వామి శ్రీనివాస జయంతి మహోత్సవాలను పురస్కరించుకొని ఆలయంలో ప్రత్యేక పూజా కార్యక్రమాలు నిర్వహించారు.

పది రోజుల పాటు విశేష పూజలు

నవరాత్రి ఉత్సవాల్లో భాగంగా పది రోజుల పాటు ప్రతిరోజూ అమ్మవారు వివిధ రూపాల్లో భక్తులకు దర్శనమిచ్చారు. బాలా పూజ, కన్యా పూజ, సామూహిక కుంకుమార్చన, చిన్నారులకు అక్షర స్వీకారం, బతుకమ్మ సంబరాలు, చండీ హోమం, మాతా కీ చౌకీ వంటి పలు ఆధ్యాత్మిక కార్యక్రమాలను ఆలయ కమిటీ నిర్వహించింది. ఈ కార్యక్రమాల్లో భక్తులు ఉత్సాహంగా పాల్గొని అమ్మవారి ఆశీస్సులు పొందారు.

శ్రీనివాస కల్యాణం.. సుదర్శన హోమం

శ్రీ వేంకటేశ్వర స్వామి శ్రీనివాస జయంతి ఉత్సవాల్లో భాగంగా సుదర్శన హోమం, శ్రీనివాస కల్యాణం నిర్వహించారు. అనంతరం అమ్మవారు, సాయిబాబా, శ్రీ వేంకటేశ్వర స్వామివార్లకు పల్లకీ సేవ నిర్వహించారు. ఈ వేడుకల్లో పాల్గొన్న భక్తులు భక్తిపారవశ్యంలో మునిగిపోయారు.

భక్తులకు ఆశీస్సులు అందించిన అమ్మవారు, స్వామివారు

ఈ సందర్భంగా ఆలయ ఫౌండర్ ఛైర్మన్ శ్రీ రఘు శర్మ శంకరమంచి మాట్లాడుతూ, నవరాత్రుల సమయంలో ప్రత్యేక పూజల్లో పాల్గొనడం ఎంతో విశేష ఫలదాయకమని తెలిపారు. భక్తులు కుటుంబ సమేతంగా ఆలయానికి విచ్చేసి అమ్మవారు, సాయిబాబా, శ్రీ వేంకటేశ్వర స్వామివారి ఆశీస్సులు పొందారని పేర్కొన్నారు.

సహకరించిన వారందరికీ కృతజ్ఞతలు

ఎస్‌డీపీఎస్‌వీ టెంపుల్ న్యూజెర్సీ స్థాపక ట్రస్టీ రఘు శర్మ మంచ్చి, దేవి నవరాత్రుల పది రోజుల వేడుకలను విజయవంతం చేయడంలో సహకరించిన భక్తులు, దాతలు, స్పాన్సర్లు, ఎస్‌డీపీఎస్‌వీటీ వాలంటీర్లు, సిబ్బంది, మీడియా ప్రతినిధులకు కృతజ్ఞతలు తెలిపారు. ప్రతి ఒక్కరి సహకారం, మద్దతుతో ఉత్సవాలు విజయవంతంగా నిర్వహించగలిగామని పేర్కొన్నారు.