దక్షిణాది టాప్ మ్యూజిక్ డైరెక్టర్, నటుడు జి.వి. ప్రకాష్ కుమార్ గురించి ప్రత్యేకంగా పరిచయం అవసరం లేదు. ప్రస్తుతం తెలుగు, తమిళ భాషల్లో బ్యాక్ టు బ్యాక్ క్రేజీ ప్రాజెక్టులతో బిజీగా ఉన్నారు. జీవీ ప్రకాశ్ కేవలం సిల్వర్ స్క్రీన్ పైనే కాదు, నిజ జీవితంలోనూ హీరో అనిపించుకుంటున్నారు.
ఎవరైనా కష్టాల్లో ఉన్నారని తెలిస్తే వెంటనే చలించిపోతారు జీవీ ప్రకాశ్. మరీ ముఖ్యంగా సోషల్ మీడియా వేదికగా తన ఉదారతను చాటుకోవడంలో ఎప్పుడూ ముందుంటారు. చదువులకైనా, వైద్యానికైనా ఆపదలో ఉన్నామని నెటిజన్లు ట్యాగ్ చేస్తే చాలు.. వెంటనే స్పందించి తన వంతు సహాయం అందిస్తుంటారు. అయితే ఈ మధ్య కాలంలో కొందరు కేటుగాళ్లు ఆయన నమ్మకాన్ని, మంచి మనసును ఆసరాగా చేసుకుని మోసాలకు పాల్పడ్డారు. ఈ వ్యవహారం ఇండస్ట్రీలో చర్చనీయాంశంగా మారిన సంగతి తెలిసిందే.
తాజాగా ఓ నెటిజన్ తన కుటుంబ సభ్యుల్లో ఒకరికి అత్యవసరంగా సర్జరీ జరగాల్సి ఉందని, ఆర్థికంగా చాలా ఇబ్బందుల్లో ఉన్నామంటూ సాయం కోరుతూ ట్వీట్ చేశారు. ఈ పోస్ట్ను చూసిన తోటి నెటిజన్లు జీవీ ప్రకాష్కు ట్యాగ్ చేయగా.. ఆయన వెంటనే స్పందించారు. గతంలో జరిగిన మోసాన్ని అస్సలు లెక్కచేయకుండా, సదరు నెటిజన్ అకౌంట్కు తక్షణ సహాయంగా రూ. 50,000 ట్రాన్స్ఫర్ చేశారు. అంతేకాదు ఆ ట్రాన్సాక్షన్ స్క్రీన్ షాట్ను షేర్ చేస్తూ.. “నా తరఫున ఇది చాలా చిన్న సాయం. ఈసారి మీరు చెప్పిన సమస్య నిజమేనని నమ్ముతున్నాను” అంటూ రిప్లై ఇచ్చారు.
సాధారణంగా ఇలాంటి ఆన్లైన్ మోసాలు ఒకసారి ఎదురైతే ఎవరైనా సరే సాయం చేయాలంటే ఒకటికి వందసార్లు ఆలోచిస్తారు. కొందరైతే అభ్యర్థనలను పట్టించుకోవడం పూర్తిగా మానేస్తారు. కానీ జీవీ ప్రకాష్ మాత్రం అలా చేయలేదు. ఆ చేదు అనుభవాన్ని మనసులో పెట్టుకోకుండా, మానవత్వమే పరమావధిగా భావించారు. వెంటనే సాయం చేశారు. దీంతో జీవీ ప్రకాశ్ పై ప్రశంసల వర్షం కురుస్తోంది.
