బాల్టిమోర్‌లో మెరిసిన రీతూ వర్మ.. 19వ ఆటా మహాసభల్లో సందడి

అమెరికాలోని మేరీల్యాండ్ రాష్ట్రం బాల్టిమోర్ నగరంలో ఘనంగా జరుగుతున్న 19వ అమెరికన్ తెలుగు అసోసియేషన్ (ATA) మహాసభలు, యువజన సమ్మేళనంలో హీరోయిన్ రీతూ వర్మ ప్రత్యేక ఆకర్షణగా నిలిచారు. తెలుగు ప్రవాసుల అతిపెద్ద సాంస్కృతిక వేడుకల్లో ఒకటైన ఈ మహాసభలకు హాజరైన ఆమె అభిమానులతో ముచ్చటిస్తూ, కార్యక్రమాల్లో ఉత్సాహంగా పాల్గొన్నారు.

ఈ మూడు రోజుల మహాసభలు జూలై 31 నుంచి ఆగస్టు 2 వరకు బాల్టిమోర్ కన్వెన్షన్ సెంటర్‌లో నిర్వహిస్తున్నారు. తెలుగు సంస్కృతి, సాహిత్యం, సంగీతం, వ్యాపారం, యువతకు సంబంధించిన పలు కార్యక్రమాలతో ఈ వేడుకలు సందడిగా కొనసాగుతున్నాయి.

ఈ వేడుకల్లో రీతూ వర్మతో పాటు హీరోయిన్ పూజా హెగ్డే సహా సినీ, రాజకీయ, సాంస్కృతిక రంగాలకు చెందిన పలువురు ప్రముఖులు పాల్గొని ప్రత్యేక ఆకర్షణగా నిలిచారు. అభిమానులు సినీ తారలతో సెల్ఫీలు దిగుతూ, వారితో ముచ్చటించే అవకాశాన్ని సద్వినియోగం చేసుకున్నారు.

ప్రతి రెండేళ్లకోసారి నిర్వహించే ఆటా మహాసభలు ప్రపంచవ్యాప్తంగా ఉన్న తెలుగు ప్రజలను ఒకే వేదికపైకి తీసుకువచ్చే అతిపెద్ద కార్యక్రమంగా గుర్తింపు పొందాయి. ఈ ఏడాది కూడా వేలాది మంది తెలుగు ప్రవాసులు బాల్టిమోర్‌కు చేరుకుని వేడుకలను విజయవంతం చేస్తున్నారు.