UK లో నివసిస్తున్న తెలుగు రచయిత్రి స్నేహా రెడ్డి కొనకటి తన చిరకాల కల అయిన “1 మిలియన్ ఫాలోవర్స్” నవలను ఆవిష్కరించారు. ఈ సందర్భంగా ఆమె తన ఆనందాన్ని, భావోద్వేగాలను పంచుకుంటూ సోషల్ మీడియాలో హృదయాన్ని హత్తుకునే సందేశాన్ని వెల్లడించారు.
చిన్న ఆలోచనగా ప్రారంభమైన తన రచనా ప్రయాణం ఎన్నో అనుభవాలు, భావోద్వేగాలను దాటుకుని నేడు ఒక అందమైన నవలగా పాఠకుల ముందుకు రావడం ఎంతో గర్వంగా ఉందని ఆమె పేర్కొన్నారు. విదేశాల్లో ఈ పుస్తకాన్ని ఆవిష్కరించడం తనకు కేవలం బుక్ లాంచ్ మాత్రమే కాదని, అది తెలుగు భాష, సంస్కృతి, గుర్తింపును వేడుకగా జరుపుకునే ప్రత్యేక సందర్భమని తెలిపారు.
తెలుగు అనేది కేవలం ఒక భాష మాత్రమే కాదని, మన భావాలు, కథలు, సంప్రదాయాలు, మూలాలను ప్రపంచానికి పరిచయం చేసే గొప్ప వారసత్వమని ఆమె అన్నారు. ప్రపంచంలో ఎక్కడ ఉన్నా తెలుగు భాష, సంస్కృతి, కథలు ఎప్పటికీ మన మూలాలతో అనుసంధానిస్తూనే ఉంటాయని ఆమె అభిప్రాయపడ్డారు.
తన “1 మిలియన్ ఫాలోవర్స్” పుస్తకాన్ని పాఠకులందరికీ ప్రేమతో అంకితం చేస్తున్నట్లు వెల్లడించిన స్నేహా రెడ్డి కొనకటి, తమ ఆదరణ, ఆశీస్సులు, ప్రోత్సాహమే తన రచనా ప్రయాణానికి మరింత బలాన్ని ఇస్తాయని ఆశాభావం వ్యక్తం చేశారు.
