బృహత్తర వాషింగ్టన్ తెలుగు సాంస్కృతిక సంఘం ఆధ్వర్యంలో వినూత్న కార్యక్రమం

– అమెరికాలో ఉన్న తెలుగు వారి కోసం ప్రత్యేక వేడుక
– సంగీతం, సాహిత్యం, హాస్యాన్ని మిళితం చేస్తూ, తెలుగుదనం ఉట్టిపడేలా షో
– ఆకట్టుకున్న చిన్నారుల నృత్య ప్రదర్శనలు

బృహత్తర వాషింగ్టన్ తెలుగు సాంస్కృతిక సంఘం (GWTCS) ఆధ్వర్యంలో ఉగాది వేడుకలను పురస్కరించుకుని వినూత్న కార్యక్రమం జరిగింది. అమెరికాలోనే మొట్టమొదటిసారిగా టీమ్ అనంతం – యూఎస్ఏ టూర్ పేరుతో సంగీతం, సాహిత్యం, హాస్యం ( ఎంఎల్సీ- మ్యూజిక్, లిటరేచర్, కామెడీ) కలబోసిన త్రివేణి సంగమంలా ఈ వేడుక సాగింది.

ఈ నెల 9న లీస్ బర్గ్ లోని జీడబ్ల్యూటీసీఎస్ ఆధ్వర్యంలో ఈ షో జరగ్గా.. వందలాది మంది పెద్దలు, చిన్నారులు సందడి చేశారు. ఈ కార్యక్రమంలో సంగీతం, సాహిత్యంతో పాటు హాస్య కార్యక్రమాలు ప్రతి ఒక్కరినీ ఆకట్టుకున్నాయని జీడబ్ల్యూటీసీఎస్ సంస్థ అధ్యక్షులు రవి అడుసుమిల్లి తెలిపారు. తెలుగు భాషను సజీవంగా నిలబెడుతున్న వేదికలు, సంఘాలలో అగ్ర తాంబూలం బృహత్తర వాషింగ్టన్ తెలుగు సాంస్కృతిక సంఘానికి దక్కుతుందని చెప్పారు. స్వర్ణోత్సవాలను జరుపుకున్న ఈ సంస్థ, యువ వారసత్వంతో మరో స్వర్ణోత్సవ కాలం పాటు ఈ పరంపరను కొనసాగిస్తుందని వెల్లడించారు. ఈ కార్యక్రమం నిర్వహణకు సహకరిస్తున్న దాతలను, యువ వాలంటీర్లను ఈ సందర్భంగా అభినందించారు.