దిగ్గజ దర్శకుడు రాజమౌళి సినిమాల్లో పురాణాల టచ్ ఎంత పవర్ ఫుల్ గా ఉంటుందో ప్రత్యేకంగా చెప్పాల్సిన పనిలేదు. బాహుబలిలో శివుడి ఎలివేషన్ అయినా, ఆర్ఆర్ఆర్ క్లైమాక్స్ లో రామ్ చరణ్ రాముడి గెటప్ అయినా.. ఆ సీన్లు ప్రేక్షకులకు గూస్బంప్స్ తెప్పించాయి. ఇప్పుడు అదే మ్యాజిక్ను రిపీట్ చేయాలని జక్కన్న ప్లాన్ చేస్తున్నారని సమాచారం.
ప్రస్తుతం ప్రిన్స్ మహేష్ బాబుతో తెరకెక్కిస్తున్న భారీ అడ్వెంచర్ చిత్రం ‘వారణాసి’. ఇందులో రామాయణం ఆధారంగా ఓ స్పెషల్ ఎపిసోడ్ను రాజమౌళి ప్లాన్ చేశారనే టాక్ నడుస్తోంది. అయితే సోషల్ మీడియాలో వినిపిస్తున్నట్టుగా అది 15 నిమిషాల సీక్వెన్స్ కాదట.. ఏకంగా 25 నిమిషాల పాటు సాగే విజువల్ వండర్ అని ప్రచారం జోరందుకుంది. అంతేకాదు ఈ భారీ ఎపిసోడ్ కోసం చిత్ర యూనిట్ దాదాపు 60 రోజుల పాటు నిరంతరం షూటింగ్ చేసిందని సమాచారం. రామాయణంలోని కీలక ఘట్టాలను కలిపి రూపొందిస్తున్న ఈ సీక్వెన్స్.. ఒక చిన్న సినిమా తీసినంత భారీ స్థాయిలో తీశారని తెలుస్తోంది.
ఇక ఈ 25 నిమిషాల ఎపిసోడ్ కోసం హైదరాబాద్లోని అన్నపూర్ణ స్టూడియోస్లో ఏర్పాటు చేసిన భారీ మోషన్ క్యాప్చర్ ఫెసిలిటీని ఉపయోగించినట్టు తెలుస్తోంది. హాలీవుడ్ లెవల్ టెక్నాలజీతో, ఇంటర్నేషనల్ స్టంట్ మాస్టర్స్ పర్యవేక్షణలో ఈ సీక్వెన్స్ను చిత్రీకరించారని సమాచారం. టైమ్ ట్రావెల్ అడ్వెంచర్ నేపథ్యంలో తెరకెక్కుతున్న ఈ సినిమాలో మహేష్ బాబు ‘రుద్ర’ అనే అడ్వెంచరర్ పాత్రతో పాటు రాముడిగా కనిపించనున్నారని టాక్. ప్రియాంకా చోప్రా, పృథ్వీరాజ్ సుకుమారన్ కీలక పాత్రల్లో నటిస్తున్న ఈ భారీ చిత్రం వచ్చే ఏడాది ఏప్రిల్ 7న ప్రపంచవ్యాప్తంగా విడుదల కానుంది. ఇప్పటికే ఈ మూవీపై భారీ అంచనాలు ఉండగా.. ఇప్పుడు రామాయణ ఎపిసోడ్ న్యూస్ తో మూవీపై మరింత హైప్ క్రియేట్ అయింది.
