అమెరికాలోని న్యూయార్క్‌లో ఆధ్యాత్మికత, సాహిత్యం, సంగీతాల సమ్మేళనంగా ‘హర హర మహాదేవ – శివ తత్వాలు’ కార్యక్రమం నిర్వహించేందుకు ఏర్పాట్లు చేస్తున్నారు. నవంబర్ 14, 2026న శనివారం ఈ ప్రత్యేక సంగీత కార్యక్రమం జరగనుంది.
న్యూయార్క్ తెలంగాణ తెలుగు అసోసియేషన్ (NYTTA), తెలంగాణ అమెరికన్ తెలుగు అసోసియేషన్ (TTA), తెలుగు లలిత కళా సమితి (TLCA), SPB మ్యూజిక్ అకాడమీ సంయుక్త భాగస్వామ్యంతో ఈ కార్యక్రమాన్ని నిర్వహిస్తున్నాయి. SPB మ్యూజిక్ అకాడమీ ఆధ్వర్యంలో ఈ సంగీత విభావరి ప్రేక్షకుల ముందుకు రానుంది.
ప్రముఖ గీత రచయిత, గాయకుడు, సినీ సంగీత దర్శకుడు, గిన్నిస్ వరల్డ్ రికార్డ్ హోల్డర్, 72 మేళకర్త రాగాలపై విశేష పట్టు కలిగిన శ్రీ స్వర వీణాపాణి ఈ కార్యక్రమానికి ప్రత్యేక ఆకర్షణగా నిలవనున్నారు.
‘హర హర మహాదేవ – శివ తత్వాలు’ పేరుతో శివుని ఆధ్యాత్మిక వైభవాన్ని, శివతత్వంలోని అంతరార్థాన్ని సాహిత్యం, సంగీతం ద్వారా ప్రేక్షకులకు అందించనున్నారు. SPB మ్యూజిక్ అకాడమీ కళాకారులు పాటలను ఆలపించనున్నారు.
నవంబర్ 14న సాయంత్రం 4 గంటల నుంచి రాత్రి 9 గంటల వరకు ఈ కార్యక్రమం జరగనుంది. న్యూయార్క్‌లోని హిక్స్‌విల్లేలో ఉన్న అసామాయి హిందూ టెంపుల్ అండ్ సాయి దర్బార్ ఈ వేడుకకు వేదిక కానుంది. కార్యక్రమానికి హాజరయ్యే వారికి డిన్నర్ సదుపాయం కూడా కల్పించనున్నారు.
సంగీతాభిమానులు, సాహిత్య ప్రియులు, శివభక్తులు ఈ కార్యక్రమంలో పాల్గొని ఆధ్యాత్మిక సంగీతానుభూతిని ఆస్వాదించాలని నిర్వాహకులు కోరుతున్నారు.
