ప్రముఖ నటుడు కమల్ హాసన్ కొత్త సినిమా టైటిల్ తమిళనాడులో వివాదానికి దారితీసింది. తన 72వ పుట్టినరోజు సందర్భంగా ప్రకటించిన కొత్త చిత్రం ‘సండియార్’ పేరుపై పుదియ తమిళగం పార్టీ తీవ్ర అభ్యంతరం వ్యక్తం చేసింది.
ఈ సినిమా టైటిల్ ప్రాంతీయ, కులపరమైన ఉద్రిక్తతలను ప్రేరేపించే అవకాశం ఉందని పుదియ తమిళగం పార్టీ వ్యవస్థాపకుడు డాక్టర్ కె. కృష్ణస్వామి అభ్యంతరం వ్యక్తం చేశారు. గతంలోనూ ఇదే పేరుతో సినిమా ప్రకటించినప్పుడు వివాదం తలెత్తిన విషయాన్ని ఆయన గుర్తుచేశారు. ఈ టైటిల్ వల్ల సామాజికంగా ఉద్రిక్తతలు పెరిగే ప్రమాదం ఉందని ఆందోళన వ్యక్తం చేశారు.
కాగా, ‘సండియార్’ అనే పేరుతో గతంలో కమల్ హాసన్ ఓ సినిమాను ప్రకటించారు. అయితే అప్పట్లో పుదియ తమిళగం పార్టీ నుంచి వ్యతిరేకత రావడంతో ఆ సినిమాకు ‘విరుమాండి’గా పేరు మార్చారు. 2004లో ఈ చిత్రం ప్రేక్షకుల ముందుకు వచ్చింది.
ఇప్పుడు రెండు దశాబ్దాల తర్వాత మరోసారి అదే టైటిల్‌ను తన కొత్త సినిమాకు పెట్టడంతో పాత వివాదం మళ్లీ తెరపైకి వచ్చింది. ఎస్.యు. అరుణ్ కుమార్ దర్శకత్వంలో తెరకెక్కనున్న ఈ కొత్త చిత్రంపై ఇప్పటికే ఆసక్తి నెలకొంది.
అయితే టైటిల్‌పై వస్తున్న విమర్శలు, అభ్యంతరాలపై కమల్ హాసన్ లేదా ఆయన నిర్మాణ సంస్థ రాజ్ కమల్ ఫిల్మ్స్ ఇంటర్నేషనల్ నుంచి ఇప్పటివరకు అధికారిక వివరణ వెలువడలేదు. దీంతో ఈ వివాదం తమిళ సినీ, రాజకీయ వర్గాల్లో చర్చనీయాంశంగా మారింది.
