సాయిదత్త పీఠం లో ఘనంగా దేవీ నవరాత్రి బతుకమ్మ వేడుకలు

ఎడిసన్, న్యూజెర్సీ: అమెరికాలోని ఎడిసన్‌లో సాయిదత్త పీఠం, శ్రీ శివ విష్ణు దేవాలయం ఆధ్వర్యంలో దేవీ నవరాత్రి బతుకమ్మ వేడుకలు అత్యంత వైభవంగా జరిగాయి. తెలంగాణ సంస్కృతి, సంప్రదాయాలను ప్రతిబింబించేలా నిర్వహించిన ఈ వేడుకల్లో భక్తులు, తెలంగాణ ఆడపడుచులు ఉత్సాహంగా పాల్గొన్నారు.

దేవీ నవరాత్రుల సందర్భంగా జగజ్జనని దుర్గామాత సన్నిధిలో మహిళలు తమ చేతులతో అందంగా పేర్చిన రంగురంగుల బతుకమ్మలను సమర్పించి, అమ్మవారిని భక్తిశ్రద్ధలతో కొలుచుకున్నారు. సంప్రదాయ బతుకమ్మలతో ఆలయ ప్రాంగణం పండుగ శోభను సంతరించుకుంది.

ఈ సందర్భంగా అత్యుత్తమంగా పేర్చిన బతుకమ్మలకు బహుమతులు అందజేశారు. అలాగే సంప్రదాయ దుస్తుల్లో హాజరైన పెద్దలు, చిన్నారులకు ఉత్తమ వస్త్రధారణ విభాగంలో బహుమతులను ప్రదానం చేశారు.

ఈ కార్యక్రమంలో సాయిదత్త పీఠం వ్యవస్థాపకులు, చైర్మన్ శ్రీ రఘు శర్మ శంకరమంచి మాట్లాడుతూ.. జగన్మాత దుర్గాదేవి ఆశీస్సులతో ప్రతి ఇంటా సుఖశాంతులు, ఆయురారోగ్యాలు, అష్టైశ్వర్యాలు కలగాలని ఆకాంక్షించారు. ప్రతి ఒక్కరి జీవితం బతుకమ్మ పూలలా వికసించాలని కోరుకున్నారు.

అమెరికాలో నివసిస్తున్న తెలుగు ప్రజలు తమ సంస్కృతి, సంప్రదాయాలను కాపాడుతూ, భావితరాలకు అందించడంలో ఇలాంటి వేడుకలు కీలక పాత్ర పోషిస్తున్నాయి.