మెగా పవర్ స్టార్ రామ్ చరణ్, దర్శకుడు బుచ్చిబాబు సానా కాంబినేషన్లో వస్తున్న భారీ చిత్రం ‘పెద్ది’. ఈ సినిమా విడుదలకు ముందే తెలంగాణలో ఊహించని షాక్ తగిలింది. మూవీ ఫస్ట్ వీక్ టికెట్ ధరలను పెంచుకోవడానికి అనుమతి ఇవ్వాలని కోరుతూ మైత్రీ మూవీ మేకర్స్ పిటిషన్ దాఖలు చేసిన సంగతి తెలిసిందే. ఈ పిటిషన్ పై విచారణ జరిపిన న్యాయస్థానం అత్యవసర ఉత్తర్వులు ఇచ్చేందుకు నిరాకరించింది. టికెట్ల ధరల విషయంలో ఈ దశలో జోక్యం చేసుకోలేమని స్పష్టం చేసింది. అనంతరం తదుపరి విచారణను జూన్ 6 వ తేదీకి వాయిదా వేసింది.
‘పెద్ది’ సినిమా జూన్ 4న విడుదలవుతుండగా, విచారణ జూన్ 6 కి వాయిదా పడింది. ఈ నేపథ్యంలో ఎలాంటి ప్రయోజనం ఉండదని భావించిన చిత్ర నిర్మాణ సంస్థ తరఫు న్యాయవాది తమ పిటిషన్ను ఉపసంహరించుకుంటున్నట్లు కోర్టుకు తెలిపారు. దీంతో ఈ పిటిషన్ను హైకోర్టు కొట్టివేసింది. ఏపీలో ‘పెద్ది’ సినిమాకు ప్రత్యేక ప్రదర్శనలు, టికెట్ ధరల పెంపునకు అనుమతులు లభించాయి. కానీ తెలంగాణలో మాత్రం పాత ధరలే ఉన్నాయి. దీంతో ఈ విషయం చర్చనీయాంశంగా మారింది.
