కేరళకు చెందిన ప్రముఖ వ్యాపారవేత్త బాబీ చెమ్మనూర్ హీరోయిన్ హనీ రోజ్కు బహిరంగంగా క్షమాపణలు చెప్పారు. జ్యువెలరీ షోరూమ్ ప్రారంభోత్సవ వేడుకలో హనీ రోజ్ను ఉద్దేశించి ఆయన చేసిన కొన్ని వ్యాఖ్యలు వివాదానికి దారితీశాయి. ఈ నేపథ్యంలోనే తనపై లైంగిక భావనలతో, అవమానకరమైన వ్యాఖ్యలు చేశారంటూ హనీ రోజ్ పోలీసులకు ఫిర్యాదు చేశారు. దీంతో చెమ్మనూర్పై క్రిమినల్ కేసు నమోదైంది.
ఈ నేపథ్యంలో, బాబీ చెమ్మనూర్ తన ఫేస్బుక్ ఖాతా ద్వారా స్పందించారు. తన వ్యాఖ్యలు హనీ రోజ్ను, ఆమె కుటుంబాన్ని బాధపెట్టాయని గ్రహించానని చెప్పారు. ఈ వివాదానికి పూర్తి బాధ్యత వహిస్తున్నానన్న చెమ్మనూర్, మనస్ఫూర్తిగా క్షమాపణలు కోరుతున్నానని ప్రకటించారు. ఆమెను బాధపెట్టాలనే ఉద్దేశం తనకు ఏమాత్రం లేదని పేర్కొన్నారు. ఈ సమస్యను సానుకూలంగా పరిష్కరించుకోవడానికి తాను సిద్ధంగా ఉన్నానన్నారు. అలాగే ఆమె తనపై పెట్టిన కేసును ఉపసంహరించుకుంటారని ఆశిస్తున్నట్లు తెలిపారు. అయితే వ్యాపారవేత్త చెమ్మనూర్ చేసిన ఈ బహిరంగ క్షమాపణలపై హనీ రోజ్ ఇంకా స్పందించలేదు.
