సినీ పరిశ్రమలో ఎప్పుడూ చర్చనీయాంశంగా మారే ‘నెపోటిజం’ (వారసత్వం)పై స్టార్ హీరోయిన్ సమంత గతంలో చేసిన వ్యాఖ్యలు ప్రస్తుతం సోషల్ మీడియాలో మరోసారి వైరల్గా మారాయి. పరిశ్రమలో బ్యాక్గ్రౌండ్ ఉన్న వారికైనా, ఎలాంటి మద్దతు లేకుండా బయటి నుంచి వచ్చిన వారికైనా వారి సొంత సవాళ్లు, సమస్యలు ఉంటాయని ఆమె అభిప్రాయపడ్డారు. ప్రతి ఒక్కరూ తమ కెరీర్లో విభిన్నమైన ఒత్తిడిని ఎదుర్కోవాల్సి ఉంటుందని ఆమె స్పష్టం చేశారు.
ప్రముఖ బాలీవుడ్ టాక్ షో ‘కాఫీ విత్ కరణ్’లో సమంత పాల్గొన్న సమయంలో.. హోస్ట్ కరణ్ జోహార్ తెలుగు ఇండస్ట్రీలోని నెపోటిజంపై ఆమెను ప్రశ్నించారు. టాలీవుడ్లో హీరోల కొడుకులు, మేనల్లుళ్లు చాలా సులభంగా హీరోలవుతుంటారని, విజయ్ దేవరకొండ లాంటి కొద్దిమంది మాత్రమే ఎలాంటి బ్యాక్గ్రౌండ్ లేకుండా వచ్చి ఇక్కడ నిలదొక్కుకున్నారని కరణ్ గుర్తు చేశారు. దీనిపై సమంత ఎంతో హుందాగా స్పందిస్తూ, ఇండస్ట్రీలో ఎవరి పోరాటం వారిదేనని చెప్పారు.
స్టార్ కిడ్స్కు కెరీర్ ఆరంభంలో అవకాశాలు రావడం సులభమే కావచ్చనే వాదనపై సమంత స్పందించారు.. సినీ కుటుంబాల నుంచి వచ్చిన వారిపై అంచనాల భారం, తీవ్రమైన ఒత్తిడి ఉంటాయని పేర్కొన్నారు. వారి ప్రతి కదలికను ప్రేక్షకులు, పరిశ్రమ నిశితంగా గమనిస్తుంటాయని అన్నారు. “నేను ఇండస్ట్రీకి వచ్చిన కొత్తలో ఫెయిల్ అయితే, ఆ విషయం మా అమ్మానాన్నలకు, సోదరులకు మాత్రమే తెలిసేది. కానీ, ఒక స్టార్ కిడ్ ఫెయిల్ అయితే ఆ విషయం దేశం మొత్తానికి తెలుస్తుంది” అంటూ ఆమె ఇరు వర్గాల మధ్య ఉన్న వ్యత్యాసాన్ని విశ్లేషించారు. అంతిమంగా ఎంతటి బ్యాక్గ్రౌండ్ ఉన్నప్పటికీ, ప్రేక్షకుల ఆదరణ ఉంటేనే ఎవరైనా పరిశ్రమలో నిలదొక్కుకోగలరని, చివరి నిర్ణయం ఎప్పుడూ ప్రేక్షకుల చేతుల్లోనే ఉంటుందని ఆమె తేల్చి చెప్పారు.
2010లో వచ్చిన ‘ఏ మాయ చేసావె’ చిత్రంతో తెలుగు తెరకు పరిచయమైన సమంత.. తన అద్భుతమైన నటనతో దూకుడు, రంగస్థలం వంటి ఎన్నో బ్లాక్బస్టర్ చిత్రాల్లో నటించి సౌత్ ఇండస్ట్రీలోనే అగ్ర కథానాయికగా ఎదిగారు. ఇటీవల ఆమె ప్రధాన పాత్రలో విడుదలైన ‘మా ఇంటి బంగారం’ చిత్రం కూడా ప్రేక్షకులను అలరించి, మంచి హిట్ టాక్ను సొంతం చేసుకుంది.
