‘హైలెస్సొ’లో విలన్‌గా శివాజీ.. ఫస్ట్ లుక్ రిలీజ్

సుడిగాలి సుధీర్‌ హీరోగా నటిస్తున్న ‘హైలెస్సొ’ సినిమా నుంచి మరో కీలక అప్‌డేట్‌ వచ్చింది. నటుడు శివాజీ పుట్టినరోజు సందర్భంగా ఆయన ఫస్ట్‌లుక్‌ను చిత్ర యూనిట్ విడుదల చేసింది. సినిమాలో ఆయన పాత్ర పేరును కూడా ప్రకటించింది.

గ్రామీణ నేపథ్యంలో తెరకెక్కుతున్న ఈ చిత్రంలో శివాజీ ‘లైలం బాబు’ అనే శక్తిమంతమైన విలన్‌ పాత్రలో కనిపించనున్నారు. ఈ నేపథ్యంలోనే ప్రేక్షకులను ఆశ్చర్యపరిచే అత్యంత పవర్‌ఫుల్‌ పాత్రలో త్వరలో పెద్ద తెరపై కనిపిస్తారు అని చిత్ర నిర్మాణ సంస్థ వజ్ర వారాహి సినిమాస్‌ సోషల్‌ మీడియాలో పోస్టు చేసింది. దర్శకుడు ప్రసన్న కుమార్‌ కోటకు ఇది తొలి చిత్రం కాగా.. సుడిగాలి సుధీర్‌కు హీరోగా ఐదో సినిమా. వ్యవసాయ కుటుంబాల్లో తరచూ వినిపించే స్థానిక పలుకుబడి నుంచే ‘హైలెస్సొ’ అనే టైటిల్‌ను తీసుకున్నట్లు తెలిపింది.

గతేడాది సెప్టెంబర్‌లో సంప్రదాయ పూజా కార్యక్రమాలతో ప్రారంభమైన ఈ సినిమాను వజ్ర వారాహి సినిమాస్‌ బ్యానర్‌పై శివ చెర్రీ, రవికిరణ్‌ నిర్మిస్తున్నారు. ఇప్పటికే హీరోయిన్‌ నక్షా శరణ్‌ పోషిస్తున్న ‘జెస్సీ’ పాత్రను కూడా చిత్రబృందం పరిచయం చేసిన సంగతి తెలిసిందే. ఈ చిత్రానికి అనుదీప్‌ దేవ్‌ సంగీతం అందిస్తుండగా, ఎడిటర్‌గా ఛోటా కె. ప్రసాద్‌, రచయితగా చింతా శ్రీనివాస్‌ పని చేస్తున్నారు. ఇక ఈ సినిమాను తెలుగు, తమిళం, కన్నడ, మలయాళ భాషల్లో విడుదల చేయాలని నిర్మాతలు భావిస్తున్నారు.