బాలీవుడ్ నటుడు టైగర్ ష్రాఫ్‌పై కాల్పులు జరిగినట్లు వచ్చిన వార్తల నేపథ్యంలో గ్యాంగ్‌స్టర్ లారెన్స్ బిష్ణోయ్ భద్రతపై అధికారులు ప్రత్యేక దృష్టి సారించారు. గుజరాత్‌లోని సబర్మతి సెంట్రల్ జైలులో అతడిని మరింత కట్టుదిట్టమైన భద్రత ఉన్న ‘200 బ్లాక్‌’కు తరలించినట్లు సమాచారం.
తనపై దాడి జరిగే అవకాశం ఉందన్న అనుమానాల నేపథ్యంలోనే అధికారులు ఈ నిర్ణయం తీసుకున్నట్లు తెలుస్తోంది. లారెన్స్ బిష్ణోయ్ 2023 నుంచి సబర్మతి జైలులో ఉంటున్నాడు.
జైలులో ఉన్నప్పటికీ బిష్ణోయ్ నేర కార్యకలాపాలను కొనసాగిస్తున్నాడనే ఆరోపణలు గతంలో వెలువడ్డాయి. అయితే, గత రెండేళ్లుగా అతడు ఎవరితోనూ సంభాషించలేదని, గోల్డీ బ్రార్ వంటి అతడి అనుచరులు విదేశాల నుంచి నేర కార్యకలాపాలను నిర్వహిస్తున్నారని దర్యాప్తు అధికారులు పేర్కొన్నట్లు సమాచారం.
ఈ నేపథ్యంలో జైలులో భద్రతను మరింత కట్టుదిట్టం చేయడంతో పాటు, నేర కార్యకలాపాల వెనుక ఉన్న నెట్‌వర్క్‌పై దర్యాప్తు సంస్థలు దృష్టి సారిస్తున్నాయి.
