రాజస్థాన్‌లోని ప్రముఖ పర్యాటక ప్రాంతం పుష్కర్‌లో ప్రతిష్ఠాత్మకమైన వార్షిక ఒంటెలు, పశువుల జాతరకు ఏర్పాట్లు ముమ్మరంగా సాగుతున్నాయి. నవంబర్ 17 నుంచి 24 వరకు ఈ జాతరను ఘనంగా నిర్వహించేందుకు అధికారులు అన్ని ఏర్పాట్లు చేస్తున్నారు.
ప్రతి ఏడాది వేలాది మంది పర్యాటకులను ఆకర్షించే ఈ జాతరలో ఒంటెలు, ఇతర పశువుల కొనుగోళ్లు, అమ్మకాలు ప్రధాన ఆకర్షణగా నిలుస్తాయి. అంతేకాకుండా రాజస్థాన్ సంప్రదాయాలు, సంస్కృతి, కళలు, గ్రామీణ జీవనశైలిని ప్రతిబింబించే అనేక కార్యక్రమాలు సందర్శకులను ఆకట్టుకోనున్నాయి.
జాతర ప్రారంభానికి ముందే పర్యాటకులు పుష్కర్‌కు చేరుకుంటున్నారు. ఎడారి ప్రాంత అనుభూతిని ఆస్వాదించేందుకు భిల్వారా నుంచి వచ్చినట్లు ఓ పర్యాటకుడు తెలిపారు.
జాతర తేదీలు దగ్గరపడుతుండటంతో పుష్కర్ నగరమంతా సందడిగా మారింది. దేశవిదేశాల నుంచి వచ్చే పర్యాటకులకు ఎలాంటి ఇబ్బందులు కలగకుండా అధికారులు విస్తృత ఏర్పాట్లు చేస్తున్నారు.
రాజస్థాన్ సంస్కృతి, సంప్రదాయాలను ప్రపంచానికి పరిచయం చేసే ఈ పుష్కర్ ఒంటెల జాతర కోసం పర్యాటకులు ఆసక్తిగా ఎదురుచూస్తున్నారు.
