అమెరికాలోని చార్లెట్ కన్వెన్షన్ సెంటర్ వేదికగా జరుగుతున్న టీటీఏ మెగా కన్వెన్షన్–2026లో నిర్వహించిన బ్యూటీ పేజెంట్ పోటీలు వైభవంగా ముగిశాయి. ప్రవాస తెలుగు యువత, మహిళల ప్రతిభ, ఆత్మవిశ్వాసం, ఫ్యాషన్ నైపుణ్యాన్ని వెలికితీసే లక్ష్యంతో నిర్వహించిన ఈ పోటీలకు విశేష స్పందన లభించింది.
ఈ పోటీల్లో ‘టీన్ టీటీఏ’, ‘మిస్ టీటీఏ’, ‘మిసెస్ టీటీఏ’ విభాగాల్లో ప్రతిభ కనబరిచిన విజేతలకు టీటీఏ ఫ్యాషన్ అవార్డులు ప్రదానం చేశారు. ముఖ్యంగా ‘టీన్ టీటీఏ–2026’ విజేతకు నిర్వాహకులు కిరీటాన్ని అలంకరించి ఘనంగా సత్కరించారు. ప్రేక్షకుల హర్షధ్వానాల మధ్య జరిగిన ఈ కార్యక్రమం కన్వెన్షన్లో ప్రత్యేక ఆకర్షణగా నిలిచింది.
రంగురంగుల దుస్తులు, ఆకట్టుకునే ర్యాంప్ వాక్, ఆత్మవిశ్వాసంతో కూడిన ప్రదర్శనలతో పోటీదారులు తమ ప్రతిభను చాటుకున్నారు. ప్రవాస తెలుగు సమాజంలో మహిళలు, యువతకు తమ ప్రతిభను ప్రదర్శించుకునే వేదికగా టీటీఏ బ్యూటీ పేజెంట్ నిలిచిందని నిర్వాహకులు తెలిపారు.
విజేతలకు కన్వెన్షన్ నిర్వాహకులు, ప్రముఖ అతిథులు అభినందనలు తెలియజేస్తూ, భవిష్యత్తులో మరిన్ని విజయాలు సాధించాలని ఆకాంక్షించారు. టీటీఏ మెగా కన్వెన్షన్లో సాంస్కృతిక కార్యక్రమాలతో పాటు ఇటువంటి ప్రత్యేక ఈవెంట్లు సందర్శకులను విశేషంగా ఆకట్టుకుంటున్నాయి.
