పశ్చిమాసియాలో కొనసాగుతున్న ఉద్రిక్తతల నేపథ్యంలో హర్ముజ్ జలసంధిని తిరిగి తెరిచేందుకు ఇరాన్ ప్రతిపాదించిన ఏడు రోజుల రోడ్మ్యాప్ను అమెరికా అధ్యక్షుడు డొనాల్డ్ ట్రంప్ తిరస్కరించారు. ఇరాన్ విదేశాంగ మంత్రి అబ్బాస్ అరాఘ్చీ ఈ ప్రతిపాదనను మధ్యవర్తుల ద్వారా అమెరికాకు పంపినట్లు తెలిపారు. ప్రతిపాదనలో కాల్పుల విరమణ, అమెరికా నౌకాదళ ఆంక్షల సడలింపు వంటి షరతులు ఉన్నట్లు అంతర్జాతీయ మీడియా నివేదికలు పేర్కొన్నాయి.
అమెరికా ప్రతిపాదనను తిరస్కరించిన నేపథ్యంలో అరాఘ్చీ మాట్లాడుతూ.. అవసరమైతే తీవ్రమైన యుద్ధాన్ని ఎదుర్కొనేందుకు ఇరాన్ సిద్ధంగా ఉందని అన్నారు. అయితే అదే సమయంలో దౌత్యానికి తలుపులు మూసివేయలేదని, శాంతి కోసం చర్చలకు అవకాశం ఉందని స్పష్టం చేశారు.
ఇరాన్ ప్రతిపాదన ప్రకారం, నిర్దిష్ట షరతులు అంగీకరించబడితే ఏడు రోజుల్లో హర్ముజ్ జలసంధిలో సాధారణ నౌకాయానాన్ని పునరుద్ధరించేందుకు సిద్ధంగా ఉన్నట్లు అరాఘ్చీ తెలిపారు.
మరోవైపు, ట్రంప్ ఈ వారంలో ఇరాన్తో మరిన్ని చర్చలు జరిగే అవకాశం ఉందని పేర్కొన్నట్లు తాజా నివేదికలు వెల్లడిస్తున్నాయి. దీంతో హర్ముజ్ జలసంధి విషయంలో తదుపరి దౌత్య పరిణామాలపై అంతర్జాతీయంగా ఆసక్తి నెలకొంది
