2013లో స్థాపించబడిన గ్రేస్ క్యాన్సర్ ఫౌండేషన్ (GCF), క్యాన్సర్‌పై అవగాహన కల్పించడం, ముందస్తు గుర్తింపు, స్క్రీనింగ్, వైద్య సేవలు, పరిశోధన రంగాల్లో విశేష కృషి చేస్తోంది. కమ్యూనిటీ కేంద్రంగా ప్రారంభమైన ఈ సంస్థ, ప్రస్తుతం క్యాన్సర్ నియంత్రణ కోసం విస్తృత స్థాయిలో సేవలందించే వేదికగా ఎదిగింది.
ఫౌండేషన్ చేపట్టిన మొబైల్ క్యాన్సర్ స్క్రీనింగ్ కార్యక్రమం ద్వారా భారతదేశంలోని వెనుకబడిన వర్గాలకు, ముఖ్యంగా గ్రామీణ ప్రాంత ప్రజలకు సేవలు అందిస్తోంది. ఇప్పటివరకు ఈ కార్యక్రమం ద్వారా 10 లక్షల మందికి చేరువై క్యాన్సర్‌పై అవగాహన కల్పించడంతో పాటు, ముందస్తు గుర్తింపునకు కృషి చేసింది.
ఈ నేపథ్యంలో గ్రేస్ క్యాన్సర్ ఫౌండేషన్ ఆధ్వర్యంలో క్యాన్సర్ అవగాహన, ముందస్తు గుర్తింపు, స్క్రీనింగ్ కార్యక్రమాలకు నిధుల సమీకరణ లక్ష్యంగా న్యూజెర్సీలోని నార్త్ బ్రన్స్‌విక్‌లో ఉన్న గురు ప్యాలెస్‌లో ప్రత్యేక కార్యక్రమం నిర్వహించారు.
ఈ నిధుల సేకరణ కార్యక్రమానికి పలు తెలుగు సంస్థల నాయకులు, స్థానిక వ్యాపారవేత్తలు హాజరయ్యారు. క్యాన్సర్‌పై అవగాహన పెంపొందించడం, వ్యాధిని ప్రారంభ దశలోనే గుర్తించే స్క్రీనింగ్ సేవలను మరింత మందికి అందుబాటులోకి తీసుకురావడం వంటి లక్ష్యాలకు మద్దతుగా పలువురు ఉదారంగా విరాళాలు అందించారు.
అమెరికాతో పాటు భారతదేశంలోని తమ స్వస్థలాల్లో గ్రేస్ క్యాన్సర్ ఫౌండేషన్‌తో కలిసి క్యాన్సర్ అవగాహన శిబిరాలను నిర్వహించనున్నట్లు NATS, TANA సంస్థల ప్రతినిధులు ప్రకటించారు. ఈ శిబిరాల ద్వారా సమీకరించే నిధులు క్యాన్సర్‌ను ప్రారంభ దశలో గుర్తించేందుకు, అవసరమైన స్క్రీనింగ్ సేవలను ప్రజలకు చేరువ చేసేందుకు దోహదపడనున్నాయి.
ఈ కార్యక్రమం విజయవంతం కావడంలో గ్రేస్ క్యాన్సర్ ఫౌండేషన్ కార్యక్రమాలకు గొప్ప మద్దతుదారుగా నిలుస్తున్న విద్యా గారపాటి గారి నిస్వార్థ కృషి కీలకంగా నిలిచింది. క్యాన్సర్‌పై అవగాహన పెంపొందించేందుకు, ముందస్తు గుర్తింపు కార్యక్రమాలను విస్తరించేందుకు ఆమె అందిస్తున్న సహకారం అభినందనీయం.
గ్రేస్ క్యాన్సర్ ఫౌండేషన్ వ్యవస్థాపకులు, సీఈఓ, రోబోటిక్ సర్జికల్ ఆంకాలజిస్ట్, క్యాన్సర్ సర్జన్ డాక్టర్ చిన్నబాబు సుంకవల్లి గారు క్యాన్సర్ నియంత్రణ, ముందస్తు గుర్తింపు, ప్రజలకు వైద్య సేవలు అందించే దిశగా చేస్తున్న కృషికి పలువురు అభినందనలు తెలిపారు.
క్యాన్సర్‌ను ముందుగానే గుర్తించడం ద్వారా అనేక మంది ప్రాణాలను కాపాడే అవకాశం ఉంది. ఈ లక్ష్యంతో అమెరికా, భారతదేశాల్లో మరిన్ని అవగాహన కార్యక్రమాలు, స్క్రీనింగ్ శిబిరాలు నిర్వహించడం ద్వారా ప్రజారోగ్య పరిరక్షణకు గ్రేస్ క్యాన్సర్ ఫౌండేషన్ తన సేవలను మరింత విస్తరించనుంది.
