ప్రభాస్ ‘ఫౌజీ’ రిలీజ్ డేట్ ఖరారు.. అంచనాలు పెంచేసిన కొత్త పోస్టర్‌

పాన్ ఇండియా స్టార్ ప్రభాస్ నటిస్తున్న ప్రతిష్టాత్మక చిత్రం ‘ఫౌజీ’ విడుదల తేదీని చిత్ర బృందం అధికారికంగా ప్రకటించింది. దర్శకుడు హను రాఘవపూడి తెరకెక్కిస్తున్న ఈ సినిమా 2026 డిసెంబర్ 3న ప్రపంచవ్యాప్తంగా ప్రేక్షకుల ముందుకు రానుంది. విడుదల తేదీతో పాటు విడుదల చేసిన కొత్త పోస్టర్ ప్రస్తుతం సోషల్ మీడియాలో వైరల్ అవుతోంది.

కొత్త పోస్టర్‌లో ప్రభాస్ యుద్ధభూమిలో గాయాలతో, రక్తపు మరకల మధ్య తుపాకీ చేతబట్టి కనిపించడం అభిమానులను విశేషంగా ఆకట్టుకుంది. శిథిలాల నడుమ ఒంటరిగా పోరాడుతున్న సైనికుడిగా ఆయన లుక్ సినిమాపై మరింత ఆసక్తిని పెంచుతోంది. “ఒంటరిగా పోరాడే ఓ బెటాలియన్” అనే ట్యాగ్‌లైన్ కథలో దేశభక్తి, త్యాగం, ధైర్యానికి ప్రాధాన్యం ఉండబోతున్నట్లు సూచిస్తోంది. మొత్తంగా పోస్టర్ రూపకల్పనలో చారిత్రక అంశాలను ప్రతిబింబించేలా ప్రత్యేక డిజైన్‌ను ఉపయోగించారు. దీంతో సినిమా ఏ కాలం నేపథ్యంలో సాగుతుందనే చర్చ అభిమానుల్లో మొదలైంది. అయితే కథకు సంబంధించిన కీలక వివరాలను మాత్రం చిత్ర యూనిట్ గోప్యంగా ఉంచింది.

ప్రస్తుతం చిత్రీకరణ చివరి దశలో ఉండగా, పోస్ట్ ప్రొడక్షన్ పనులు కూడా వేగంగా కొనసాగుతున్నాయని సమాచారం. ప్రకటించిన తేదీకే సినిమాను విడుదల చేసేలా చిత్ర బృందం సన్నాహాలు చేస్తోంది. ఇక  ఈ చిత్రంలో ప్రభాస్ సరసన ఇమాన్వీ కథానాయికగా నటిస్తుండగా, మిథున్ చక్రవర్తి, జయప్రద, అనుపమ్ ఖేర్ కీలక పాత్రలు పోషిస్తున్నారు. హను రాఘవపూడి–ప్రభాస్ కాంబినేషన్‌లో వస్తున్న తొలి చిత్రం కావడంతో ‘ఫౌజీ’పై ఇప్పటికే భారీ అంచనాలు నెలకొన్నాయి. విడుదల తేదీ పోస్టర్‌తో ఆ అంచనాలు మరింత పెరిగాయి.