టాలీవుడ్ యంగ్ హీరో అక్కినేని అఖిల్ హీరోగా నటించిన లేటెస్ట్ మూవీ ‘లెనిన్’. ఈ సినిమా ఇవాళ ప్రేక్షకుల ముందుకు వచ్చింది. ఈ నేపథ్యంలో ప్రముఖ నటి సమంత.. అఖిల్కు, చిత్ర బృందానికి సోషల్ మీడియా వేదికగా శుభాకాంక్షలు తెలపడం అందరి దృష్టిని ఆకర్షిస్తోంది.
‘లెనిన్’ ట్రైలర్ను తన ఇన్స్టాగ్రామ్ స్టోరీలో పంచుకున్న సమంత, అఖిల్ను ట్యాగ్ చేస్తూ ఒక సందేశాన్ని పోస్ట్ చేశారు. ”లెనిన్ చిత్ర బృందానికి, అఖిల్కు ఆల్ ది వెరీ బెస్ట్. ఇప్పటికే ‘పెద్ద బ్లాక్బస్టర్ వైబ్స్’ కనిపిస్తున్నాయి” అని ఆమె పేర్కొన్నారు. సమంత విషెస్ చెప్పడం ప్రస్తుతం సోషల్ మీడియాలో వైరల్ గా మారింది.
కాగా, ఇటీవలే సమంత నటించిన ‘మా ఇంటి బంగారం’ సినిమాపై అఖిల్ కూడా ప్రశంసలు కురిపించారు. ‘లెనిన్’ ప్రమోషన్లలో భాగంగా ఓ ఇంటర్వ్యూలో ఆయన మాట్లాడుతూ, ఆ సినిమా కాన్సెప్ట్ చాలా ఫ్రెష్గా ఉందని చెప్పారు. అలాగే మూవీ వైబ్ బాగుందని అన్నారు. ఇలా ఒకరి చిత్రాలపై మరొకరు పాజిటివ్గా స్పందించుకోవడం ఆసక్తికరంగా మారింది.
అయితే సుమారు మూడేళ్ల గ్యాప్ తరువాత అఖిల్ నుంచి వస్తున్న సినిమా కావడంతో లెనిన్ పై భారీ అంచనాలు నెలకొన్నాయి. అంచనాలకు తగ్గట్టుగానే సినిమాకు ప్రేక్షకుల నుంచి మంచి స్పందన వస్తోంది. దీంతో అక్కినేని అభిమానులు ఆనందం వ్యక్తం చేస్తున్నారు.
