తమిళనాడులో ప్రముఖ కొరియోగ్రాఫర్, నటుడు, దర్శకుడు రాఘవ లారెన్స్ రాజకీయ ప్రవేశంపై సోషల్ మీడియాలో జోరుగా ప్రచారం సాగుతోంది. గత కొన్ని రోజులుగా హల్ చల్ చేస్తున్న ఈ రూమర్లపై లారెన్స్ స్వయంగా స్పందించిన విషయం తెలిసిందే. తన జీవితంలో అత్యంత కీలకమైన, రాజకీయ నిర్ణయాన్ని త్వరలోనే అధికారికంగా వెల్లడిస్తానని ప్రకటించారు. దీంతో తమిళ రాజకీయాలు ఒక్కసారిగా వేడెక్కాయి. తిరుచ్చి ఈస్ట్ అసెంబ్లీ స్థానానికి జరగనున్న ఉప ఎన్నికల్లో ఆయన పోటీ చేయబోతున్నారనే ఊహాగానాల నేపథ్యంలో, ఆయన తీసుకోబోయే నిర్ణయంపై తీవ్ర ఉత్కంఠ నెలకొంది.
రాఘవ లారెన్స్ ముందుగా ప్రకటించిన దాని ప్రకారం జూన్ 11న ఉదయం 9:30 గంటలకు కీలక ప్రకటన వెలువడాల్సి ఉంది. అయితే, ఊహించని విధంగా కోలీవుడ్ లెజెండరీ దర్శకుడు భారతీరాజా కన్నుమూశారు. దీంతో యావత్ చిత్ర పరిశ్రమ తీవ్ర విషాదంలో మునిగిపోయింది. సినిమా రంగానికి భారతీరాజా చేసిన అపార సేవలకు, ఆయనపై ఉన్న గౌరవ సూచకంగా రాఘవ లారెన్స్ తన జీవితంలో తీసుకోబోయే ఆ నిర్ణయ ప్రకటనను వాయిదా వేస్తున్నట్లు ప్రకటించారు. ఆ విషయాన్ని జూన్ 12 ఉదయం 10:00 గంటలకు వెల్లడిస్తానని సోషల్ మీడియా వేదికగా తెలిపారు.
